Atdhe Nuhiu është një tjetër futbollist i cili po kalon në një formë të mirë personale. Sulmuesi shtatëlartë pritet të ketë minuta në dy ndeshjet e muajit tetor, të cilat Kosova i zhvillon ndaj Gjibraltarit në miqësore dhe Malit të Zi në kualifikuese.
Ai në konferencën pas seancës stërvitore të ditës së martë u shpreh optimist për këto dy sfida të “Dardanëve”, derisa u ndal me theks të veçantë te ndeshja e 14 tetorit.
“Ndeshja me Malin e Zi është shumë me rëndësishme për ne, por ashtu ka qenë edhe ndeshjet me Çekinë dhe Bullgarinë më herët, pra është një lojë shumë e rëndësishme për ne, por jo më shumë se të mëparshmet. Kemi pasur rezultate të mira ndaj tyre dhe tash po shpresojmë të kemi edhe ndaj Malit të Zi. Sa i përket ndeshjes me Gjibraltarin, po është një test shumë i mirë për ne por edhe është një përgatitje për Malin e Zi”, ka thënë Nuhiu.
Ndeshja me Gjibraltarin do të zhvillohet më dhjetë tetor nga ora 18:00 në “Fadil Vokrri”, ndërsa katër ditë më vonë (14 tetor) do ta zhvillojë ndeshjen ndaj Malit të Zi, e vlefshme për eliminatoret e Kampionatit Evropian “Euro2020”.