Biletat për ndeshjen e 17 nëntorit mes Kosovës dhe Anglisë në “Fadil Vokrri” i kishin shqetësuar tifozët anglezë, të cilët prisnin në ankth njoftime për këto bileta.
Megjithatë, tani ata janë ndarë të kënaqur me 752 biletat që u janë ndarë atyre, me çmim prej pesë eurosh.Më 17 nëntor, Kosova do ta presë Anglinë në Prishtinë për ndeshjen e fundit në kuadër të Grupit A kualifikues për Kampionatin Evropian 2020.
Biletat për këtë ndeshje pritet të shiten shumë shpejt kur të dalin në shitje javën e ardhshme, shkaku edhe i kapacitetit të ulët të ulëseve në “Fadil Vokrri”.
Mirëpo, jo vetëm tifozët e Kosovës ishin duke pritur në ankth për të siguruar bileta për këtë përballje.Përkundër që në mediat kosovare raportohej se dy mijë bileta do të ndaheshin në “Fadil Vokrri” për tifozët e Anglisë, këta të fundit nuk merrnin asnjë njoftim nga Federata e Futbollit e Anglisë.
Mbi tre mijë tifozë anglezë u regjistruan në uebsajtin e Federatës së Futbollit të Anglisë për të kërkuar bileta, mirëpo atyre nuk iu bë e ditur se sa bileta janë në dispozicion për ta, por vetëm se një delegacion do të udhëtojë në Kosovë për ta marrë vesh vendimin përfundimtar.
Ky vendim përfundimtar ishte se Anglisë iu dhanë 752 bileta, pak më shumë sesa pesë përqindëshi i ulëseve në stadium që i takojnë skuadrës mysafire, me çmim prej pesë eurosh.E pikërisht çmimi i lirë u bëri përshtypje tifozëve të Anglisë, të cilët në anën tjetër u shprehën të pakënaqur që nuk ishin njoftuar më parë për biletat në mënyrë që të rezervonin bileta për udhëtim dhe vendqëndrim para se të ngriheshin çmimet.
“Është e konfirmuar, ne i kemi 752 bileta për ndeshjen në Kosovë, secila me çmim prej pesë eurosh”, shkroi @EnglandFansTwi, ndaj të cilit u përgjigjën shumë tifozë.
Në anën tjetër, disa tifozë të Anglisë lajmëruan se ata do të udhëtojnë në Prishtinë edhe pse s’kanë bileta për ndeshjen.Federata e Futbollit e Anglisë u ndau bileta vetëm tifozëve që i kishin përcjellë nga afër të paktën 58 ndeshje të “Tre Luanëve”.