Kandidati për Kryeministër nga koalicioni AAK-PSD, Ramush Haradinaj, ka thënë se kundërkandidatët e tij duhet të bëhen gati për ta përkrahur konceptin e tij “100% Kosovë.
Gjatë bashkëbisedimit me qytetarët organizuar online nga KDI, një komentues i tha Haradinajt se duhej të bëhej gati për t’ia uruar fitoren Albin Kurtit.
Kështu u përgjigj Haradinaj:
“Nëse ja japin votat qytetarët, e uron qytetari. Unë ju kisha thënë të bëheni gati të ma uroni mua sepse mendoj që e kam dëshmuar me punë se sa mundem ta ndryshoj gjendjen në vend dhe sa mund ta forcojë Kosovën . Oponentëve ju kisha thënë të bëhen gati ta përkrahin “100% Kosovë”.
Përveç kësaj, një tjetër komentues i kërkoi ta uronte LDK-në që për kandidate ka Vjosa Osmanin.
“LDK ka qeverisur gjatë me vendin. Një herë kam bashkë-qeverisur edhe unë me ata. Tash mendoj që koncepti i Qeverisë “100% Kosovë”, është më i sigurti edhe për LDK edhe për partitë tjera”, ishte përgjigjja e Haradinajt.