Kosova ka mbyllur ciklin kualifikues për “EURO 2020” duke u renditur në pozitën e tretë të Grupit A.
Megjithatë, “Dardanët” do të kenë një tjetër mundësi të arrijnë kualifikimin drejt Kampionatit Evropian, pasi që në muajin Mars do të përballet me Maqedoninë në gjysmëfinalen e Play-Offit të Ligës së Kombeve.
Por, ç’është e vërteta Kosova ishte shumë afër ta arrinte plasmanin drejt “EURO 2020” edhe në fazën e grupeve, derisa ishte në lojë deri 180 minuta para se të mbylleshin kualifikimet.
Anglia dhe Republika e Çekisë dolën më të zotë se “Dardanët” duke rrëmbyer dy vendet e para.
Në këtë kampanjë kualifikuese djelmoshat e Bernard Challandes patën paraqitje mjaft të mira, derisa për tu veçuar janë pesë prej tyre.
Pra, futbollisti me paraqitjet më të mira te Kosova ishte Vedat Muriqi, i cili zë vendin e 141-të në ranglistën e përgjithshme me 722 pikë.
Pas tij vjen Valon Berisha në vendin e 159-të me 679.
Listën e pesë më të mirëve të Kosovës në këtë cikël eliminator e përmbyllin Arijanet Muriç, Fidan Aliti dhe Amir Rrahmani.