Numri i personave në Zvicër të cilët marrin ndihma sociale të ashtuquajtura “ekonomike” në vitin 2018 ka shënuar një rënie. Është rënia e parë që nga viti 2008, bëhet e ditur në një komunikatë të lëshuar të hënën nga Zyra federale e Zvicrës për Statistikë.
Kështu, numri i njerëzve të regjistruar në fund të vitit 2017 si përfitues të ndihmave sociale ka qenë 272.700 ose 5600 më i vogël se ai i një viti më parë.
Në këtë statistikë nuk përfshihet ndihma sociale në sferën e azilit dhe refugjatëve, ku numri i përfituesve në fakt është rritur.
Në përgjithësi, në rreth gjysmën e kantoneve është ulur shkalla e të varurve nga ndihmat sociale. Vetëm në kantonet su Glarus, Jura dhe Valis ka pasur një ngritje në këtë drejtim, shkruan albinfo.ch.
Shkalla e përfituesve të ndihmave sociale në nivel vendi, në fund të vitit 2018 ka qenë 3.2 për qind ose për 0.1% më e ulët se një vit më parë.
Shkallë më të lartë të përfituesve nga ndihmat sociale kanë pasur kantonet si: Neuchatel, Basel-Stadt, Gjeneva, Vaudi dhe Berna. Ndërsa shkallën më të ulët kantonet: Uri, Schwyz, Unterwalden, Obwalden dhe Appenzell Innerhoden.
Ulje është arritur si në numrat absolutë të shfrytëzuesve të ndihmave sociale ashtu dhe në përqindjen në raport me numrin e banorëve.
Sikurse edhe më parë, një shkallë më e lartë e rrezikut për t`u bërë rast social ekziston në qytete se sa në fshatra, transmeton albinfo.ch. Ndërsa kategoritë më të rrezikuara në këtë drejtim janë: personat e mitur, të shkurorëzuarit dhe të huajt.
Nga ana tjetër, sa më e lartë shkalla e arsimimit , më e madhe mundësia për t`iu shmangur ndihmave sociale. Mirëpo, ky rregull nuk vlen te personat mbi 56 vjeçarë. Ata edhe kur kanë shkallë të lartë të arsimit, rrezikohen për të “rrëshqitur” në ndihma sociale.