Edhe aventura e Klevis Lushakut te Vushtrria ka qenë jetëshkurtër. Mbrojtësi 19 vjeçar nga Durrësi ka njoftuar se ka mbyllur bashkëpunimin me “Forcën” dhe tashmë është një futbollist i lirë, shkruan Gaztasheshi.
Lajmin e ka zbuluar vetë futbollisti, i cili i ka thënë se ka vendosur të ndërpresë bashkëpunimin me Vushtrrinë, pasi që nuk e kanë gjetur gjuhën e përbashkët për të vazhduar.
“E kam mbyllur kontratën e Vushtrrinë, pasi që nuk kemi gjetur gjuhën e përbashkët me drejtuesit e klubit. Jam futbollist i lirë dhe në shqyrtim të ofertave”, deklaroi Lushaku për Gazetasheshi.com.
Lushaku erdhi gjatë afatit kalimtar të verës nga skuadra e Teutës së Durrësit.
Ai është paraqitur në 14 ndeshje këtë edicion dhe ka shënuar një gol, madje duke i siguruar një pikë skuadrës së tij në barazimin 2-2 në “Ferki Aliu” ndaj Flamurtarit.