Sponsori i Kombëtares së Kosovës, Fourteen, e ka zbuluar edhe fanellën e veçantë që do ta mbajnë të veshur “Dardanët” më 17 nëntor, për ndeshjen kundër Anglisë.
Vetëm rreth 24 orë pasi u zbulua fanella e veçantë që lojtarët e Kosovës do ta kenë për ndeshjen kundër Çekisë, faqja zyrtare e Fourteen e ka zbuluar edhe atë për ndeshjen kundër Anglisë.
“Ne e mbajmë fjalim. Kosova kundër Anglisë – edicioni i veçantë i fanellës së parë. Porositeni tani dhe mbështeteni Kombëtaren tuaj”, ka shkruar Fourteen në rrjetin social Facebook.
Kosova do të luajë kundër Çekisë më 14 nëntor si mysafirë, e tre ditë më vonë do ta presë në “Fadil Vokrri” Anglinë. Këto dy ndeshje, të fundit në kuadër të Grupit A kualifikues për EURO 2020, do të jenë vendimtare për fatin e Kosovës.
Kosova duhet të ngrihet të paktën në pozitën e dytë në tabelën e Grupit A për ta arritur kualifikimin në Kampionatin Evropian përmes fazës së grupeve. Më poshtë mund t’i lexoni rezultatet që i duhen Kosovës në dy ndeshjet e nëntorit – kundër Çekisë dhe Anglisë, për ta siguruar kualifikimin.
– Kosova eliminohet nëse humb kundër Republikës Çeke.
– Nëse Kosova e mposht Çekinë, atëherë mund t’i duhet barazimi kundër Anglisë varësisht nga rezultati i ndeshjes Bullgari – Çeki (nëse Çekia fiton kundër Bullgarisë, Kosovës do t’i duhej të paktën barazim kundër Anglisë; çfarëdo barazimi apo humbje e Çekisë kundër Bullgarisë do ta dërgonte Kosovën automatikisht në Evropian, pavarësisht rezultatit kundër Anglisë).
– Nëse Kosova barazon kundër Çekisë, atëherë Kosovës i duhet të paktën barazim kundër Anglisë dhe Çekia duhet të humbë kundër Bullgarisë.
– Nëse Kosova s’e arrin kualifikimin në këtë mënyrë, e ka të siguruar një vend në play-offs, si fitues i Grupit D3 të Ligës së Kombeve.