Agim Veliu, ka folur para mediave.
Ka filluar mbledhja e Kryesisë së Lidhjes Demokratike të Kosovës, në të cilën pritet të mandatohet kandidati për kryeministër.
Para se të fillojë mbledhja e Kryesisë së Lidhjes Demokratike, anëtari i kësaj kryesie, Agim Veliu është deklaruar për medie.
Ai ka thënë se preferon që LDK-ja në zgjedhjet e parakohshme të shkojë e vetme dhe të mos bëj koalicion me asnjë parti politike, përfshirë edhe Lëvizjen Vetëvendosje.
“Unë personalisht jam që Lidhja Demokratike e Kosovës të garojë e vetme në këto zgjedhje, të matet me subjektet e tjera politike, ta shohim fuqinë e Lidhjes Demokratike të Kosovës edhe pas zgjedhjeve t’i lexojmë rezultatet e zgjedhjeve dhe të vendosim. Kjo është rruga më e mirë”, deklaroi Veliu, raporton lajmi.net.
Në anën tjetër sa i përket kandidaturës së mundshme të Vjosa Osmanit për kryeministre, Veliu ka thënë se atë dhe Osmanin e bashkon LDK-ja.
“Mua dhe zonjën Osmani na bashkon LDK-ja kështu që jemi në një rrugë të përbashkët”, u shpreh Veliu para gazetarëve.
Tutje ai ka thënë se akoma nuk dihet se kush do të jetë kandidat për kryeministër nga LDK-ja, por që ai shpreson që subjekti i tij të marrë vendimin për kandidatin që është më i mirë për vendin dhe për LDK-në.
“Nuk e di unë kush janë kandidatët për kryeministër. Për secilin që do të tregojë interesim dhe LDK-ja do ta merr vendimin më të marrë vendimin më të mirë për të dhe për vendin”, deklaroi Veliu.
I pyetur se nëse ka qenë shenjë pakënaqësie që ai nuk mori pjesë të shtunën në mbledhjen e Kryesisë, Veliu ka thënë se kjo nuk ka të bëj aspak me këtë.