Sport

Prishtina shkruan për rivalin në Ligën e Kampionëve: Njihuni me Ferencvarosin, gjigantin hungarez

Prishtina ka arritur ta kalojë pa problem raundin preliminar të Ligës së Kampionëve.

Kampioni në fuqi i Kosovës mposhti Folgoren dhe pastaj Inter d’Escales për të kaluar në raundin e parë të garës më të madhe evropiane për klube.

E në këtë raund garash, Prishtina do të përballet me gjigantin hungarez, Ferencvaros, skuadër e cila edicionin e kaluar kishte arritur në fazën e grupeve.

Faqja zyrtare e Prishtinës ka publikuar një shkrim rreth këtij klubi, ku tifozët kosovarë do ta kenë më të lehtë të njoftohen se me çfarë kundërshtari do të kenë punë bardhekaltërtit.

Shkrimi i plotë dhe pa ndërhyrje nga FC Prishtina:

Prishtina asnjëherë nuk është takuar në gara ndërkombëtare me skuadër më të madhe se Ferencvarosh

Ju prezantojmë skuadrën e tre finaleve të kompeticioneve të mëdha dhe njëherë fituese e tyre, 32 herë kampionët e Hungarisë, Ferencvarosh

Rivali i Prishtinës i raundit të parë të UEFA Champions League, Ferencvarosh apo Fradi, siç e quajnë tifozët e saj, është skuadra më e madhe hungareze dhe jo vetëm. “Shqiponjat e gjelbra” janë ndër skuadrat më të suksesshme të Evropës së Mesme. Fitues të “Inter-Cities Fairs Cup”, paraardhëse e UEFA Kupës, në vitin 1965 duke e mposhtur në finale Juventusin e madh në Torino (1-0). Gati për ta përsëritur suksesin e madh ishin po në të njëjtin kompeticion edhe më 1968 kur ishin mposhtur nga Leeds United, kurse arritën deri në finale të Kupës së Kupave edhe në vitin 1975 kur u mposhtën nga Dinamo Kiev.

Skuadra e themeluar para 122 vitesh në të quajturin “Distriktin 9” të Budapestit, janë skuadra më e trofeshme hungareze, si në garat vendore, po ashtu edhe ato ndërkombëtare. Kanë fituar 32 tituj kampion, 23 Kupa të Hungarisë dhe kanë qenë pjesëmarrëse në grupet e UEFA Europa League në edicionin 2019/20 dhe në Champions League në edicionin e fundit, 2020/21.

Kanë arritur 209 ndeshje ndërkombëtare me 95 fitore, 51 barazime dhe 63 humbje me goldallim +72, 323:251.

Një fakt interesant është se skuadra e Ferencvaroshit ka bilanc të barabartë me skuadrat shqiptare, ka zhvilluar katër ndeshje, me Partizanin dhe Tiranën, nga dy me secilën duk arritur dy barazime dhe eliminim nga të “Kuqtë” e Tiranës dhe një fitore e një humbje me Tiranën, megjithëse kishin kaluar tutje.

Në “transfermarkt”, vlejnë afër 40 milionë euro, kurse lojtari më i shtrenjtë konsiderohet anëtari i Kombëtares së Shqipërisë, Myrto Uzuni me 3 milionë euro. Uzuni ishte blerë nga Lokomotiva e Zagrebit me 1.8 milionë euro. Po ashtu, anësori shqiptar është futbollisti më produktiv i skuadrës me 12 gola të shënuara dhe asistime në edicionin 2020/21.

Në kampionatin evropian “Euro 2020”, Ferencvarosh ishte i përfaqësuar me pesë futbollistë në Përfaqësuesen e Hungarisë. Dy portierët, Adam Bogdan e Denes Dibusz, mbrojtësit Endre Botka (të gjitha 3 paraqitjet) e Gergo Lovrencsics (të gjitha 3 paraqitjet – 1 titullar dhe 2 zëvendësues) si dhe mesfushori, David Siger (1 ndeshje si zëvendësues).

Ferencvaroshin pas 3 vitesh shumë të suksesshme, e ka lënë kryetrajneri, ish-futbollisti i njohur ukrainas, Serhiy Rebrov. Me të “gjelbrit” ka fituar tre tituj kampioni, ka luajtur në grupet e Europa dhe Champions League duke regjistruar 132 ndeshje ku prej tyre 82 fitore apo 62% me rezultat pozitiv. Ai është rikthyer te skuadra nga kishte ardhur në “Fradi”, Al-Ain të Emirateve të Bashkuara Arabe.

Rebrov është zëvendësuar me strategun austriak 55 vjeç, Peter Stoger. Ish-futbollisti i skuadrave të njohura austriake, si Rapid e Austria Vjenë, para Ferencvaroshit ka udhëhequr skuadra të mëdha si Borussia Dortmund (2017/18), Koln, Grazer dhe së fundi Austria Vjenë (2020/21).

Skuadra hungareze është në mesin e përgatitjeve në Austri duke zhvilluar disa miqësore me skuadra të njohura dhe duke triumfuar në to, si me kampionët e Bullgarisë, Ludogorets (3-1) dhe ata polak, Legia Varshavë (2-0).

Në garat zyrtare, Ferencvarosh nuk ka pësuar humbje në 12 ndeshjet e fundit (ishte mposhtur për Kupë), kurse kampionale nuk ka pësuar që nga 20 janari apo në 18 ndeshjet e fundit.

Postime të ngjajshme
Sport

Ardian Nuhiu se harron ndeshjen kundër Feyenoordit: Ja çka iu thash futbollistëve

Sport

EKSKLUZIVE: KF Onix arrin marrëveshje me ish-lojtarin e Llapit

Sport

Napoli mposht bindshëm Bayernin në kuadër të miqësoreve para-sezonale

Sport

Liverpool gati kontrata e reja për 6 yjet e tyre, disa nuk janë në listë