Komisioni Qendror i Zgjedhjeve është duke pritur partitë politike nëse kanë ndonjë ankesë në PZAP që të certifikojnë rezultatin e zgjedhjeve të 6 tetorit, shkruan Gazeta Express
Kështu ka deklaruar ky institucion në një përgjigje për Gazetën Express.
Zëdhënësi i KQZ-së, Valmir Elezi, ka bërë të ditur se janë duke pritur afatin 24 orësh për të parë nëse do të ketë ankesë, që pastaj të procedojnë me publikimin e rezultateve.
“Rinumërimi është përmbyllur në orën 14:00 të ditës së diel, prandaj duhet të presim afatin ligjor 24 orësh nëse ka ndonjë ankesë në PZAP, lidhur me administrimin e numërimit në QNR, para se të procedojmë me publikimin e rezultateve pas procesit të rinumërimit”, ka deklaruar Elezi.
Ndryshe, dje ka përfunduar rinumërimi i mbi 1400 vendvotimeve, për të cilat pati vendosur PZAP-i pas ankesës së koalicionit Nisma-AKR-PD.
PZAP-i ndërkohë e ka hedhur poshtë ankesën e Lëvizjes Vetëvendosje për numërim të disa pakove që kanë ardhur jashtë afatit kohor nga diaspora.