Skuadra kampione e Kosovës në konkurrencën e femrave, Mitrovica, ka shkruar një faqe të re në historinë e futbollit tonë.
Kampionet e vendit tonë kanë arritur ta kalojnë me sukses rrethin kualifikues të Ligës së Kampionëve, pasi janë renditur në pozitën e parë në Grupin 2, ndeshjet e të cilit grup janë zhvilluar në Nikshiq.
Skuadra e Mitrovicës i ka mbyllur garat e këtij grupi me tri fitore në po aq ndeshje të zhvilluara.
Në ndeshjen e fundit dhe përcaktuese për pozitën e parë, mitrovicaset kanë shënuar fitore në duel me kampionet e Malit të Zi, Breznica Pljevlje, me rezultat 1:0.
Ndonëse për kampionet tona në këtë ndeshje mjaftonte edhe barazimi, ato, megjithatë arritën që t’i gëzohen fitores me golin e shënuar nga Kaltrina Biqkaj, në minutën e 90-të nga penalltia. Paraprakisht, Mitrovica kishte mposhtur edhe Olimpia Cluj dhe NSA Sofia.
Kësisoj, për herë të parë në historinë e re të futbollit kosovar, një klub i yni do të marrë pjesë në rrethin e dytë të Ligës së Kampionëve në konkurrencën e femrave, ku janë të përfshira 32 ekipe.
Shorti për rrethin e dytë do të tërhiqet më 16 gusht në Nion, derisa ndeshjet e këtij rrethi do të zhvillohen me sistem eliminimi më 11 ose 12 shtator dhe më 25 ose 26 shtator. /BlicMedia