Prishtina ka pësuar humbjen e parë nën drejtimin e Armend Dallkut në xhiron e nëntë të Superligës, duke u mposhtur nga Ballkani me rezultatin 1:0.
Pas ndeshjes, ka folur trajneri i Prishtinës, Armend Dallku, i cili u shpreh i zhgënjyer me humbjen e pësuar, pasi që në Suharekë kishin udhëtuar për pikët e plota.
“Prishtina nuk ishte në element, e kemi ditur pse kemi ardhur këtu por nuk ia arritëm. Vetëm një rast e kishte Ballkani dhe e shënoi. Është normale që do pësojmë dhe barazojmë, shpresoj ti përmirësojmë gabimet dhe të rikthehemi në lojë. Fusha nuk na lejoi ta bëjmë lojën tonë”, ishin fjalët e Dallkut për “Super Sport Kosovën”.
Prishtina pas këtij takimi është e gjashta me 13 pikë, derisa Ballkani me fitore del në krye të tabelës me 20 pikë.